Taller compostelán de influencia mateana. Primeira metade do S. XIII. Granito

A cerimonia de consagración da catedral, en 1211, serve tamén para establecer a conclusión do proxecto mateano que se iniciou cara a 1168.
Con todo, as obras habían de continuar no complexo catedralicio e delas íanse a encargar unha serie de artistas formados no taller do Mestre Mateo, expandindo o seu estilo por toda Galicia e desenvolvendo unha arte con personalidade propia que habería de pervivir no tempo. A un deses artistas de formación mateana cabe atribuír este busto dun anxo que desprega unha cartela en diagonal, unha obra cuxa localización orixinal descoñécese pero que estaría en relación cos diversos proxectos que se haberían de acometer, por aqueles anos, na catedral compostelá.