No primeiro tramo da fachada sur do coro do Mestre Mateo repetiríase a secuencia de personaxes do piar ao lado dereito da parte central do Pórtico da Gloria, formado polos apóstolos Pedro, Paulo, Santiago e Xoán. Con este último identificouse a peza actualmente exposta no Museo Catedral, tras o seu achado, en 1988, cando servía como material construtivo nun muro da chamada “buchería”, situada nos sotos do claustro catedralicio.
A peza apoiaría, en actitude pensativa, o seu queixo sobre a man esquerda, á vez que un libro pechado situado sobre o xeonllo serviría de apoio ao cóbado.
Presenta unha particularidade que lle dá un valor especial entre os restos recuperados do coro mateano, un relevo no seu reverso no que se aprecian as melenas e a cola dun león que coinciden, en forma e dimensións, cos leóns representados no Pórtico da Gloria, mostrando unha reutilización anterior dentro do taller.