Descrición

Está composto por cinco libros recompilados de maneira anónima, que reúnen textos referentes ao Apóstolo Santiago e á Catedral:

Libro I) Colección litúrxica (música e texto) para a Misa e Oficio das festividades de Santiago (folios 1r-139v).

Libro II) Recompilación de vinte e dous milagres acontecidos entre 1080 e 1135 (folios 139v-155v).

Libro III) Presenta dúas narracións sobre a translación (traslatio) dos restos do Apóstolo desde Xerusalén a Compostela.

Libro IV) A Historia Turpini relata as xestas de Carlomagno e do seu sobriño Roldán en Hispania; atribúese ao arcebispo Turpin de Reims (folios 162r-191v).

Libro V) A “Guía do Peregrino” fala dos catro camiños a Santiago e da información práctica; foi atribuído ao papa Calixto II (1116-1124) e ao seu chanceler, Aymeric Picaud. Inclúe unha descrición da catedral románica no momento da redacción (folios 192r-213v).

Apéndice musical, milagres e outros textos, incluíndo o antigo himno dos peregrinos (folios 214r-225v).

A iluminación do Códice dátase contra 1137-1154. As miniaturas e iniciais decoradas conforman un conxunto moi unitario, aínda que con algunhas diferenzas formais que permiten reformular a posibilidade de que sexa obra de distintas mans malia que pertencentes a un mesmo obradoiro. É moi probable que tanto os calígrafos coma os iluminadores procedesen do norte da Francia actual. Empregaron un rico cromatismo, a partir de vermellos, verdes, azuis e amarelos, sobre todo nas iniciais decoradas. Atópanse ao longo do manuscrito numerosas iniciais miniadas, de tamaños variados e decoradas con motivos vexetais, e en ocasións, con animais reais e fantásticos e figuras antropomórficas.