Descrición

Composto por 291 folios, o Tombo B foi promovido polo arcebispo Berenguel de Landoria para recompilar documentación relativa ás súas posesións e dereitos, estando neste volume os privilexios reais e os diplomas pontificios, mentres que a de tipo particular iría ao Tombo C e as normas internas e comunitarias ao Libro de constitucións. Toda a documentación copiada é anterior á morte do arcebispo en 1330, pero existe algún caso engadido posteriormente que chega contra o ano 1421.

A súa única miniatura atópase no folio 2v. A iluminación ocupa toda a páxina, aínda que se divide en dúas escenas diferentes, ambas protagonizadas polo Apóstolo Santiago. A imaxe superior representa a Santiago entronizado, cun báculo en tau na man dereita e na esquerda un filacterio que o identifica. Atópase envolto nunha arquitectura gótica que semella un baldaquino e está acompañado, a ambos lados, polos seus discípulos Teodoro e Atanasio, identificados polas respectivas inscricións. Parece unha composición propia dun altar; a representación descrita sitúase sobre un mantel anguloso, e a imaxe do Apóstolo está inspirada na do altar maior da catedral compostelá.

Pola súa parte, a escena inferior representa a Santiago sobre un cabalo branco, suxeitando coa man esquerda as bridas e unha bandeira coa imaxe de tres vieiras mentres que coa dereita brande unha espada. No ángulo superior esquerdo aparece un rótulo que anuncia “IACOBUS. XPI MILES”. Baixo o cabalo represéntanse os corpos e as cabezas cortadas de varios soldados, que portan cascos e visten cotas de malla. Ao fondo, á dereita, disponse a torre dun castelo con ameas. Hai que entender esta imaxe no seu contexto: don Berenguel de Landoria sufriu a sublevación dos burgueses da cidade e tivo que refuxiarse no castelo da Rocha Forte. Pódese interpretar, polo tanto, coma un Santiago defensor da Igrexa compostelá, anos antes de que se desenvolvese a iconografía propia do Santiago Matamouros.