Descrición

Trátase dun cadro de dobre cara na Porta que comunica o Pórtico Real co interior da Catedral de Santiago. Cara ao interior, aparece representado o sepulcro apostólico sobre unha nube e iluminado pola estrela, enmarcado nunha coroa de loureiro. Cara ao exterior, recóllese a intervención do apóstolo Santiago na Batalla de Clavijo, no ano 859.

Segundo Fernández Castiñeiras e Monterroso, podería ser obra de Manuel Arias Varela ao compartir elementos estilísticos coa mesma escena pintada na bóveda da Sala Capitular e co Santiago Matamouros de Uzal, xa que os dous compartiron mestre ―García de Bouzas―. Pola súa parte, García Iglesias data a obra arredor de 1800, cando Arias Varela xa estaría morto, e atribúe a autoría a Fernández de Arosa; pintor que se puido formar co propio Arias Varela.