Descrición

Dentro da colección catedralicia, conservada no seu Arquivo–Biblioteca, trátase do libro de coro número 48, vinculado coa figura do chantre D. Andrés de Gondar e que, iconograficamente, xira en torno á figura de Santiago, na súa condición de patrón de España e devoción principal da Coroa.

Ao longo das súas 73 páxinas, conta con oito miniaturas realizadas en tinta sobre pergamiño, entre as que destaca especialmente unha representación do altar maior da catedral e a imaxe de Santiago sedente. Ademais, a portada ilumínase cunha orla con motivos vexetais e vieiras na que se pode ver o retrato do papa Benedito XIV (1740-1758), o que permite a súa datación.