Descrición

Peza de gran formato realizada contra 1571, en Italia, para a nave capitá da frota da Liga Católica. Tendo en conta que foi pensada para voar e non ser vista de preto, a calidade da pintura e do debuxo é sorprendente, xa que retrata con todo luxo de detalles as imaxes que se suceden, entre as que destacan o rostro do Crucificado e do Pai no Trono de Graza.

Desde a parte máis ancha ata o tramo final, representa o Calvario e o Trono de Graza ―emblemas da Santa Sé―, o León de san Marcos ―que alude á representación de Venecia―, o brasón imperial da Casa de Austria, o Grifón da Serenísima República de Xénova, san Xoán Evanxelista, Santiago Peregrino, san Xoán Bautista, o escudo de Castela e da Casa Savoia, e unha cartela na que se identifica o lema asumido por Carlos V: NON PLUS ULTRA.

Asócianse como santos protectores Xoán Bautista, Santiago o Maior e Xoán Evanxelista, sendo o Bautista o máximo intercesor. A dobre devoción dos Xoáns foi debida á procura de amparo para o propio Xoán de Austria. A presenza de Santiago o Maior está xustificada por ser o patrón de España e da súa monarquía. Represéntase nimbado, cunha túnica vermella e manto branco, as cores da súa Orde, e cóbrese cun sombreiro de peregrino adornado por unha vieira.