Descrición

Na parte superior do fondo do arcosolio do sepulcro de don Alonso Sánchez de Moscoso, na parede do lado do Evanxeo, atópase un mural co tema da Quinta Angustia, atribuído a Sixto de Frisia, un autor vinculado ao gótico hispano-flamengo. Orixinalmente, no canto do devandito sepulcro, atoparíase un altar dedicado a san Sebastián.

Segue o esquema típico destas representacións, centrando a composición na Virxe María co corpo de Cristo no colo, de menor tamaño, que parece durmir no regazo da súa Nai.

No tocante á técnica, as figuras están contornadas por unha liña ben marcada que acentúa as súas desproporcións. O fondo aparece cuberto de estrelas, cousa moi común nas pinturas murais hispano-flamengas, mentres que o intradorso do arco se ornamenta con motivos vexetais conformados por parellas enfrontadas de golfiños e aves.