Descrición

Aínda que se perdeu parte da obra, responde á iconografía característica de san Roque, vestido de peregrino e na compañía dun can e dun anxo que aparece apalpando a chaga da súa perna. Contrastan os tons ocres do santo coas cores claras e frías da roupa do anxo.
Un detalle de especial relevancia é que, no fondo, se representan as torres da fachada do Obradoiro, naquel momento en construción e na que traballou o propio García de Bouzas na súa decoración. Trataríase do rexistro pictórico máis antigo que se conserva desta fachada, que serve para situar a escena, aínda que en realidade, san Roque nunca peregrinou a Compostela. Non obstante, é unha advocación de especial devoción na cidade pola súa protección na peste que a asolou no século XVI.