Descrición

O tríptico atopábase na predela dun retablo lateral, no Antecabido, coa temática da Paixón de Cristo. A escena da Santa Cea estaba na parte frontal, mentres que as do Lavatorio e a Oración na Horta, de menor tamaño, se aloxaban nos laterais.

Na escena do Lavatorio, a composición céntrase na figura de Cristo, nimbado, coma o resto de personaxes representados, de xeonllos, no acto de lavar os pés a Pedro ―símbolo da súa humildade―, quen cunha man agarra as súas roupas e coa outra fai un aceno de aceptación. Complétase cunha estrutura arquitectónica cunha porta en forma de arco desde a cal dous apóstolos observan a escena desde a distancia. Estes son representados cun menor tamaño, para marcar esta separación espacial.

Na Derradeira cea os discípulos dispóñense ao longo dunha mesa, centrada por Xesús bendicindo co cáliz na man. Identificamos á súa dereita a san Pedro, caracterizado igual que nas outras imaxes que completan o tríptico. Ao lado esquerdo, san Xoán, pero no canto de representarse reclinado sobre Cristo como adoita aparecer, neste caso apoia a cabeza na mesa. Xudas aparece sentado enfronte de Cristo, rompendo a composición, sen nimbo e escondendo a bolsa de moedas. O resto dos personaxes dialogan entre si de xeito inconexo, agás Santiago o Maior, que é o único que mira directamente a Xesús.

Finalmente, na escena da Oración na horta a composición está centrada pola figura de Cristo axeonllado, orando mentres un anxo se lle aparece co cáliz, cos seus discípulos Pedro, Santiago e Xoán durmidos preto del. O feito de que se represente o anxo indica que segue a narrativa do Evanxeo de san Lucas, o único que o menciona. A través da paisaxe constrúe un espazo en perspectiva, unha característica do estilo renacentista, pero aínda con aspectos arcaizantes como a diminución dos tamaños para marcar a distancia, unha herdanza do estilo hispano-flamengo. Esta intención tamén se observa na primeira imaxe, a través da introdución da arquitectura, pero diminuíndo o tamaño dos apóstolos que observan a escena.

Durante un tempo, no século XVIII, o tríptico formou parte dun retablo que contaba co Retablo Goodyear como peza principal, e estaba coroado por un relevo de madeira policromada da Aparición da Virxe do Pilar a Santiago, atribuído a Diego Sande.