Descrición

Obra realizada polo pintor Francisco Couselo del Villar, do que constan escasos datos; aínda que o seu traballo pode rastrexarse pola xeografía galega, poñendo especial atención nas pinturas realizadas no Santuario da Nosa Señora das Ermitas (O Bolo).

Na colección catedralicia consérvase esta tea encargada en 1737 polos marqueses de Santa Cruz de Rivadulla, padroeiros da capela de Mondragón. A súa intención era introducir na catedral o culto a esta advocación mariana, naquel momento en expansión por toda Galicia.

Segue a iconografía habitual da Virxe do Socorro, consonte o narrado nas Cantigas de Afonso X: intervindo milagrosamente como defensora da fe fronte ao mal.

Para a súa factura, o autor limitouse a facer unha copia da obra realizada por Claudio Coello, para o mosteiro de San Martiño Pinario, no ano 1681. Malia ter unha gran capacidade pictórica, o autor non conseguiu plasmar a gama cromática nin a elegancia do orixinal. Neste caso, válese dun punto de vista máis baixo que o forza a alongar as figuras e tensar os movementos. Érguese sobre unha peaña barroca na que se le: “Spes nostra, Salve” (Esperanza nosa, Salve), frase tomada da antífona mariana Salve Regina.