Descrición

Xunto á imaxe do Ecce Homo do mesmo autor, esta obra estaría destinada á nova portada do trascoro, a carón da imaxe barroca da Soidade. A súa forma, rematada de maneira arqueada na parte superior, correspóndese coa do fornelo que ocupaba neste espazo.

Representa á Virxe ensimesmada, cun puñal atravesando o seu corazón, rodeada de once miniaturas con formato de tondos coma se fosen un marco, creando un cadro dentro doutro cadro. Nestas pequenas imaxes pode verse a pericia do artista na miniatura xunto ao debuxo moi coidado, que destacan respecto á pouca expresividade da central.

É, precisamente, nestas miniaturas, nas que se representan momentos da vida de Xesús e de María, onde o artista fai un maior esforzo pictórico, empregando diversas referencias de grandes mestres da pintura, cun sentido ecléctico propio de comezos do romanticismo.