Descrición

Xunto co lenzo da Dolorosa, ambas pezas foron encargadas polo bispo auxiliar Manuel de Sanlúcar para os dous fornelos dos laterais do altar do trascoro, presidido pola imaxe barroca da Soidade, o que explica a súa curiosa forma. Tras a retirada do coro da nave central da catedral, en 1945, a parella pasou por distintas localizacións e, desde hai uns anos, atópase na antesancristía.

Na escena central represéntase o Ecce Homo, rodeado de dezaseis miniaturas organizadas a modo de tondos coma se fosen un marco, creando un cadro dentro doutro cadro. Nestas pequenas imaxes vese a pericia do artista na miniatura xunto ao debuxo moi coidado, que contrasta coa pouca expresividade da imaxe central, que mostra unha contención propia do neoclasicismo, na que predominan as cores frías sobre fondos neutros escuros.

As miniaturas representan as estacións do Vía Crucis, agás a que está baixo a escena central, que reproduce unha Adoración.

Fronte a esa frialdade da escena central, nas miniaturas é onde o artista fai o maior esforzo pictórico, empregando diversas referencias de grandes mestres da pintura cun sentido ecléctico propio de comezos do romanticismo.