Descrición

Mariano Tito Vázquez foi un destacado retratista e artista clave no panorama artístico compostelán do século XX, mestre de varios dos protagonistas da escena pictórica da cidade. A obra foi un encargo do Cabido no ano 1929, e trátase dun retrato póstumo do cóengo e historiador López Ferreiro, falecido en 1910.

O personaxe aparece representado nos seus labores de investigador e escritor, nunha mesa con libros, e destaca a minuciosidade e expresividade do retrato. A composición está relacionada cunha fotografía realizada en 1910 por Tito Lens para Vida Gallega, pero dulcificando os seus trazos e co escritorio máis ordenado. Na parte inferior disponse unha inscrición latina que identifica ao cóengo e fai referencia a súa obra como historiador, pois trátase do autor da Historia de la Santa A. M. Iglesia de Santiago.