Descrición

Executoria asinada en Granada o 2 de agosto de 1576, en defensa do Voto de Santiago. Contén cinco miniaturas, aparecendo baixo a base das catro primeiras unha lenda que di: DON PHILIPE (Epifanía) POR LA GRACIA DE DIOS (Derrota de Albelda), REI DE CASTILLA (Batalla de Clavijo), DE LEÓN DE ARAGÓN (Rei Ramiro I outorgando o privilexio). A última miniatura é un retrato de Filipe II, ao que se alude ao inicio do documento.

Na correspondente á Batalla de Clavijo, represéntase na parte inferior o exército cristián dividido en dous grupos, cada un deles cun guerreiro á súa fronte que porta un estandarte. No primeiro plano, aparece o Apóstolo Santiago, a lombos do seu cabalo branco, sobre os inimigos xa vencidos. Na subida do outeiro, atópanse pequenas capelas ante as cales se dispón un sacerdote que lles imparte a comuñón aos que xa loitaron. E na parte superior aparece a tenda real tras a vitoria.

A escena do Privilexio de Ramiro desenvólvese no interior dun templo presidido por un retablo con forma de tríptico que contén no centro unha imaxe de Santiago peregrino, con bordón e o sombreiro ás costas, mentres que nos laterais se representa a Atanasio e Teodoro, os seus discípulos, en forma de grisalla. Diante do retablo, a escena desenvólvese en dous niveis. No primeiro, o máis baixo, represéntase tres grupos de xente orante: no centro, eclesiásticos; á dereita, personalidades de carácter civil; e á esquerda, soldados. No segundo nivel, no centro disponse a cruz de Afonso III e, a cada lado un grupo: á dereita do retablo, uns homes presididos por Ramiro I e, enfronte, unhas mulleres presididas pola raíña consorte, neste caso Paterna ou Urraca. A ambos os dous lados do retablo ábrense ventás, que permiten ver a cidade de Compostela amurallada e un castelo ao lonxe, que pode ser unha referencia á Raíña Lupa.