Descrición

Nos muros da capela do antigo Asilo de Carretas, hoxe Centro Internacional de Acollida ao Peregrino, consérvanse oito grandes lenzos pintados por Juan Luis entre 1920 e 1922 no seu estudo de Madrid. Os seis cadros de maior tamaño distribúense nos laterais dos primeiros tramos da nave, mentres que os outros dous se atopan a cada lado da parte superior do retablo.

Tres das pezas que representan a vida de Xesús foron realizadas nos anos 1920 e 1921: O descanso na fuxida a Exipto, Xesús na casa de Marta e María e Xesús predicándolle á xente desde unha barca. Nestas obras apréciase a influenza dos grandes muralistas do quattrocento italiano, en especial Ghirlandaio, Fra Angélico e Masaccio. De 1921 é tamén a representación de san Francisco nun dos laterais da capela.

A Morte de San Xosé sumouse, en 1922, xunto con Santa Isabel de Hungría curando os tiñosos e Os anxos músicos, obras nas que incorpora elementos propios dos simbolistas franceses como Moreau e Chavannes.