Descrición

Situado fronte a Cristo camiño do Calvario, ocupa o lateral esquerdo do fornelo que contén a imaxe de Santiago Peregrino realizada por José Gambino en 1754 para a Sala Capitular.

Represéntase o episodio da Conversión de Saulo, no momento no que cae do cabalo camiño de Damasco ante a aparición do Mesías. O seu autor emprega unha composición dinámica, dominada polos escorzos das figuras que se afastan cara aos marxes ante o milagre, deixando no centro do cadro a san Paulo, xa no chan, e aos seus acompañantes. Establécese deste xeito un eixo central que se estende desde Saulo ata o Redentor, que aparece sobre eles envolto nunha luz dourada entre o ceo nubrado, mentres porta a cruz na súa man dereita. Por isto, tamén adoita ser interpretada como a Batalla na Ponte Milvio, onde a Constantino se lle aparece o mesmo símbolo para anunciarlle a vitoria. Finalmente, na escena xérase unha convincente sensación de tridimensionalidade grazas á luz e á disposición das figuras.

Ademais das características que levaron a Monterroso a sinalar a súa filiación co taller de Frans Francken o Novo, no caso desta peza poden atoparse influenzas de deseños de Rubens como o conservado no Metropolitan Museum of Art de Bolswert; e, tamén, cun cobre da mesma atribución, propiedade do anticuario vasco Francisco Javier Jiménez.