Descrición

Entre a rica produción de García de Bouzas coma un dos principais pintores da Catedral no século XVIII, consérvase este lenzo no que se representa o momento da Flaxelación de Cristo a mans dos soldados de Pilato, antes da súa Crucifixión.

A escena está centrada polo corpo encurvado de Cristo e pola columna á que permanece atado, coas mans ás súas costas e con expresión de dor. Aparece coroado de espiños e cuberto co pano, como comeza a ser habitual a partir do século XII. Ao seu redor, dous soldados provistos de látegos e tres personaxes masculinos ―un neno, un mozo e un ancián―, cun can na esquina inferior dereita, contemplan o padecemento de Cristo, pechando a composición.