Atr. Taller bearnés activo en Compostela. Ca. 1150. Mármore

Este fragmento de relevo actualmente conservado no Museo Catedral podería proceder do veciño Mosteiro de Antealtares, onde foi achado nos anos 40 do século pasado.
Atribuíuse a un taller de formación bearnesa activo en Compostela nos anos centrais do século XII e que posiblemente traballaría na remodelación de Antealtares que incluíu un novo altar e unha portada, á cal pertencería esta peza, quizais, polo seu lateral biselado, a unha das xambas daquela.
A figura coroada que se conserva completa, situada baixo unha arquería de medio punto, estendendo a súa man dereita, identificouse como unha Virxe da Anunciación, que se completaría, alén, co relevo do Arcanxo.
A placa continuaría con outra imaxe feminina, da que só se conserva a cabeza, neste caso tocada e situada baixo unha arquitectura igual que a anterior.